_{СӨ муниципальнай сулууспатын туйгуна Анна Михайловна Уларова СӨ Бырабыыталыстыбатыгар үлэҕэ көһөн барарынан сибээстээн, кинини улуус, Ньурба к., тэрилтэлэр уонна уопсастыбаннай түмсүүлэр салайааччылара алҕаан-эҕэрдэлээн атаардылар.}

Бүгүн киэһэ улуус баһылыгын социальнай боппуруостарга солбуйааччыта, СӨ муниципальнай сулууспатын туйгуна Анна Михайловна Уларова СӨ Бырабыыталыстыбатыгар үлэҕэ көһөн барарынан сибээстээн, кинини улуус, Ньурба к., тэрилтэлэр уонна уопсастыбаннай түмсүүлэр салайааччылара алҕаан-эҕэрдэлээн атаардылар. А.М.Уларова 1996 с. Ньурбаҕа кэлиэҕиттэн, 15 сыл устата улуус дьаһалтатын дьиэ кэргэҥҥэ отделын кылаабынай исписэлииһинэн, отдел сэбиэдиссэйинэн, онтон социальнай көмүскэл управлениетын салайааччытынан, улуус баһылыгын социальнай боппуруостарга солбуйааччытынан үрдүк эппиэтинэстээхтик уонна ситиһиилээхтик үлэлээн кэллэ. Улуус баһылыгын солбуйааччыта Василий Семенов Анна Михайловнаҕа "Ньурба улууһун социальнай-экэнэмиичэскэй сайдыытыгар кылаатын иһин" бэлиэни, улуус Сүбэтин бэрэссэдээтэлэ Сергей Евсеев улуус Сүбэтин Бочуотунай грамотатын, Ньурба к. баһылыга Геннадий Игнатьев Махтал суругу туттардылар. Элбэх истиҥ-иһирэх махтал тыллара этилиннилэр, Махтал суруктар, өйдөбүнньүк бэлэхтэр туттарылыннылар. Анна Уларованы ирдэбиллээх уонна дьоҥҥо үтүө сыһыаннаах, болҕомтолоох салайааччы быһыытынан сыаналыылларын, киниттэн элбэххэ үөрэммиттэрин махталлаахтык саныылларын бэлиэтээн туран, инники үлэтигэр ситиһиилэри баҕардылар. Киэҥ Ньурбаны иккис төрөөбүт дойду оҥостон, улууспут үтүө тускулун туһугар айымньылаах уонна таһаарыылаах үлэни өрө туппут, дьон туһугар улахан кыһамньылаах кэллиэгэбитигэр олоҕор-үлэтигэр ситиһиилэри, дьолу-соргуну уонна этэҥҥэ буолууну баҕарабыт. Улуус дьаһалтатын пресс-сулууспата.