_{Ытыктабыллаах Ньурба улууһун олохтоохторо!}

Ытыктабыллаах Ньурба улууһун олохтоохторо!
Күндү биир дойдулаахтарбыт!
"Ньурба улууһа" муниципальнай оройуон Дьаһалтатын уонна улуус Сүбэтин аатыттан эһигини Саас уонна Үлэ бырааһынньыгынан - 1 Маайынан истиҥник эҕэрдэлиибит!
Саас уонна Үлэ бырааһынньыга дойду олохтоохторо биир саамай сөбүлүүр бырааһынньыктарынан буолар. 1 Маайы Ньурба улууһун үлэлээн иитиллээччилэрэ үлэҕэ-хамнаска кэккэ ситиһиилэрдээх көрсөллөр. Улуус сүрүн тэрилтэлэрэ туруктаах үлэлээхтэр. Ньурба улууһугар Олох-дьаһах эйгэтин тупсарыы иккис сыла салҕанар. Сүрүн болҕомто Ньурба куорат уонна нэһилиэктэр тас көстүүлэрин тупсарыыга, дьон олорор, сынньанар табыгастаах эйгэлэрин тэрийиигэ уо.д.а. ууруллар. Ньурбаҕа "Ыраас бөһүөлэк" федеральнай аахсыйа чэрчитинэн Ньурбатааҕы судаарыстыбаннай экологическай кэтэбил кэмитиэтэ көҕүлээбит "Вызов - кузов" аахсыйа, итиэннэ өр сылларга Ыраах Убайааҥҥа мунньуллубут массыына сыбаалкатын ыраастааһын ыытыллар. Судаарыстыбаннай бырагырааманан Акана орто оскуолатын, Ньурбатааҕы ДИПИ дьиэлэрин хапытаалынай өрөмүөннэрэ ыытыллар. Быйыл Ньурба к . "Саахалланар туруктаах дьиэлэртэн көһөрүү” бырагырааманан Убайааҥҥа 1 элбэх кыбартыыралаах олорор дьиэ, "Бизнес-спринт" федеральнай бырагырааманан Чаппандаҕа модульнай спортивнай саала тутуллан үлэҕэ киириэхтэрэ. Ньурба к. 3000 миэстэлээх, сүүрэр манежтаах стадион, Физкултуурунай-чэбдигирдэр комплекс, балыыһа 2-с уочаратын, Чуукаар оскуола-саадын, Күндээдэ спортивнай саалатын, Үөдэй оскуолатын спортивнай саалатын тутуу үлэлэрэ салҕанар. Үлэ дьонун эҕэрдэлиибит уонна чиэстиибит. Өр сыллаах үлэлэринэн Ньурба улууһун сайдыытыгар улахан кылааттарын киллэрбит үлэ бэтэрээннэригэр уонна билигин үлэлии сылдьааччыларга истиҥ махталбытын тиэрдэбит. Бу бырааһынньык күн эһиэхэ кытаанах доруобуйаны, олоххутугар уонна үлэҕитигэр ситиһиилэри, дьолу-соргуну уонна этэҥҥэ буолууну баҕарабыт.
"Ньурба улууһа" МО баһылыга А.М.ИННОКЕНТЬЕВ.
Улуус Сүбэтин бэрэссэдээтэлэ Н.М.МИХАЙЛОВА.